Ne l més de Maio amadurécen las cereijas ne ls cerdeiros i ls moços ancarrapítan-se nessas árboles de fruitos burmeilhos i cómen até fartar. Ye bin cierto l dito de toda la bida:
De l cereijo al castanho
Bin you me amanho.
De l castanho al cereijo
Mal me beio!...
Quien nun se ancarrapitaba neste cerdeiro?Mas este anho l tiempo ten benido de feiçon, hai alguns sítios onde pássan troniadas, mas mesmo esso ye próprio de l més de Maio. Inda hoije acerca de Mirandela, ua troniada baliente de piedra dou cabo de todo. Friu tamien nun ten faltado i you, an casa, tube que acender l lhume.
L lhume acesoAté se me lhembrou l dito:
An Maio, queima la bielha l talho.
Hoije fui, a meia tarde, a ber l termo i cada beç tengo mais pena de haber tanta giente, mesmo de l Praino, que nunca ou poucas bezes biu ls nuossos campos, neste tiempo. Las quelores i ls cheiros son cousas que mos dan ua nuoba bida.
Para ls que solo pénsan an denheiro, solo pergunto:
-Quanto bale esta frol?
Que frol ye esta?
Para quei screbir mais hoije?
7 comentários:
Buonas nuites
Á tiu Almendra, sien sigundo sentido que se puoda poner, tirai-me ua curjidade causo puodades:
por que será que an Cicuiro se diç çreijeira i noutros lhugares le chaman cerdeiro?
Ye que nun bonda los nomes seren zefrentes cume tamien muda l género!
Alhá pa los lhados de Bregáncia i Benhais tamien ya l'oubi chamar cerdeiro mas ne l Praino ye la pormeira béç.
Dius bos lo pague por m'aturardes i se furdes adreitos a la raia, mandai rezón quando birdes miolras i milpiendenas cun çubiaco de çreijas brancas.
Un Abraço
Tamien a mie se me puso essa dúbida i faziste bien poner-la.
L Pe. Moisés ten ne l sou bucabulairo cerdeira i l Pe. Mourinho usou Cerdeiro ne l sou cancioneiro.
Inda onte ne l café, an Sendin, un fizo pouco de mie, sien ser por mal i me dezie que era çreijeira.
Pus bamos a ber que diç Amadeu i se fur l causo, eimenda-se.
Por todos tenemos que fazer algo de jeito, cuido you.
Um abraço
A falar mos antendemos!
I que tengamos muitos carones para çcupir zde riba de l'arbol essa.
Abraço
Si yê stranho. You nunca habie oubido aquessa palabra. An Lhionés usan la palabra cereixal... hai qu'ambestigar isso :D
Ver ende : http://www.furmientu.org/01Documentos/21%20Exposicion.pdf
Para mi ye cereijeira ou mesmo cereijal. D'atrás habie ua ou outra i cumo era ua arbole que daba cereijas a ringalheira, pus poderie ser que le chamássen cereijal.
Almendra
I los que chaman isso cedreiro, cum ye que chaman a l fruto ?
Thierry.
Buona pergunta. Tamien nun sei.
L site que me andiqueste dá rezon al que you penso de se chamar cereijal. Cumo porqui i an toda la tierra de Leon, nun me parece que houbisse muita arbole de fruitos. Talbeç ua ou outra, por isso l nome de todas acabar an -al-.
You cuncordo cun la tue oupenion de que l sturiano, l mirandés i l leonés ténen la mesma ourige.
Almendra
Enviar um comentário