Ls mardomos de la fiesta de Santa Bárbela de Sendin stan a porparar un trabalho subre Sendin i arredores para ua rebista. Son percisos muitos retratos i de muitas cousas para se poder fazer un trabalho an cundiçones. L HOIJE ten dado la sue colaboraçon i hoije fui ua tarde que se puode cunsiderar ua leçon de stória.
Un santuário Zoela?Ls abutres, l riu i las arribas son temas amportantes i que dében star an todo l que trata de la pormoçon turística de la nuossa region i fui esso que fumos a retratar hoije. Mas nas nuossas arribas hai siempre cousas que poucos conhécen i inda menos que alguien las tenga studado. Muitos fúrun ls retratos que se tirórun, mas hoije dou-bos a coincer algo que merece un studo bien feito.
La cerimónia serie assi?Depuis de bermos bien la piedra, solo fui poner dous mardomos ne ls sítios ciertos i dezi bós se poderie ser assi ou nó. Que fázen ls arqueólogos? Porque será que quando hai porjetos nun se faç causo de quien puode ajudar?
Será que la piedra naciu assi?Esto stá nun castro que fui studado, mas que debe tener ua anterbençon maior i de modo a que las pessonas puodan tener acesso para studar i ademirar todas estas cousas. L HOIJE stará siempre pronto para ajudar, mas será que quieren ajuda?
6 comentários:
Buônas !
Si cun certeza que la ceremonie yera assi ! L'outro die foi-m'a la peinha dal Mouro an Samartino cum miu pai purqu'él sabie adonde s'ancuntraba aquessa tal peinha.
A la FLUP (Faculdade de Letras da Universidade do Porto) habie ancuntrado un studio que falaba d'aquessa peinha deziendo que staba alha grabado un pie i siete pocicas...
Quando fuemes alla ancuntremos al pie grabado... i mas de 40 pocicas, bien loinge de los 7 mancionados pul studio ! Mui pai anté ancuntrou uas que staban ya cubiertas por tierra i yerba.
Ya ancuntrei an Cicuiru, Samartino, i Custantin barias graburas i suobre todo pucicas que dalguas parecen zenhar las streilhas dal ciêlo ! Tengo an Cicuiro ua piêdra que debe de fazer uns dous metros de cumprimiento i adonde stan alla grabados dous animales, talbeç uns lhobos, tamien cun pucicas.
Ruteiros acho que se puderien fazer cun isso, so qu'a naide l'antressa y quando you falo disso dizen me que fuoran casadores que fazieren isso a tiros... !
Hai muita cousa anteressante, mas naide quier saber. L turismo ye solo para tenéren an que falar.Tamien hai ls que fázen cumo la raposa, porque nun podie apanhar las ubas dezie que stában berdes. Este dízen que son tiros de caçadores. Se calhar ténen rezon, cumo son caçadores acértan mais nas piedras que ne ls coneilhos i inda bien.
Mas la tue piedra debie ser studada. Ancuntrei ua mui parecida.
Se soubires de algo cun anteresse diç.
Abraço
Almendra
Buonas tardes
I yá fuste a la peinha de l mouro an Cicuiro Tiégui?
Essa ua de las cousas que you habie gustado de falar cuntigo l'outro die mas l tiempo ...
Hai un buono par d'anhos inda fumos alhá e cunseguimos antrar um metro ou dous, deitados por bias que habie muita tierra. Más adelantre hai ua piedra que nun deixa seguir, mas percebe-se bien que se çprendiu de riba.
Cume sabes eilhi ye ua zona de piçarras (xisto) duras i l que deixa un meio antrigado ye l motibo de tanta tierra a la salida daquel buraco!
Dezie la cuonta que habie ua galaria zde essa peinha dal Mouro anté la Lhuç i outra anté l Naso.
Un causo a desanterrar?!?!
Abraços
Ya purie mas d'un anho que cun Oscar pensamos antrar nessa lhapa i ya fui alha ua beç para ampalpar al terreno. Outros tamien dizan que sta ancantada i que sal ouro de la piedra !
La peinha que you falei, essa de Samartino chama-se "la peinha de la pisocada dal Mouro" que sta nal Rebulhon i no "peinha dal Mouro" cum la chamei. Que essa si sta antre Cicuiro i Samartino.
Ya falemos cun las outeridades cumpetintes para essa obras... ou seia Belmiro i l sou catrapilo mas diç que ten mas que xurdir...
Assi qu'inda sta cum sta, chena de tierra.
Mas un die alha iremos :-)
I sabes que tenemos treino culas lhapas... ya sploremos los Raposos i l Cudeço !
Pus ende uas fetugrafies de las cousas qu'ancuntrei :
http://cienciaanmirandes.blogspot.com
Enviar um comentário