sexta-feira, 18 de abril de 2008

O LOBO ARREPENDIDO?

L LHOBO “ARREPENDIDO” ?

Ua beç un lhobo fui-se a cunfessar porque tenie muito pecado, muito pecado!...Pus yá habie quemido mais de mil canhonas i cordeiros.
Adespuis l cura renhiu-lo muito por haber feito tanta murte. I bai anton dou-le pur penitencia que solo podie comer arrate i meio de chicha pur die.
Anton l lhobo fui-se mui triste, nun sabendo cumo habie de ser deilhi para lantre. Solo arrate i meio de chicha pur die!...
Fui-se andando puls campos, andando, mui triste i bie ls ganados guardados puls pastores i cun muito perro, que l lhadrában i curríen atrás del.
Tanto perro i tan grandes
L ganado tenie uns cordeiricos mui lindos, solo de dous meses, mui gordicos i dezie assi l lhobo:
-Si!... Si!...Cada un solo fai dues onças, nun bal la pena, pus you querie que tubisse la cunta cierta!...
Apuis de muito andar, yá lhebaba muita fame; yá se l’apegaba la barriga a las tripas i yá nun podie mais.


L ganado
Ancuntrou, anton, nun cerrado, ua burra cun burrico de trés semanas, que andaba a pacer.
L lhobo puso-se a beilar mui cuntento i a dezir assi pa la burra:
-Mira!...Burrica!...Bou-te a comer!...Agora si bou a cumprir la penitencia, cumo me mandou l cura!...

-Ye mesmo justo, justico!...
-Un arrate la burra, meio l burrico!...

I comiu-los a dambos.



La burra i l burrico

1 comentário:

faustino.antao disse...

Lhobo, lhobo i bien lhobo.
Ampeço por dezir que se tubisse que eilejir un bicho (animal) antre todos de l que you gusto mais ye de l lhobo.
I tengo rezones de sobra para oudiar lhobos. Na Casa de tiu Zé Gregoiro, miu pai, siempre hoube ganado, i you fui muitos anhos pastor, lhebórun sumiço muitos cordeiros, cordeiras, canhonas i canhonos. Mas l lhobo ye un bicho guicho, guapo, baliente, que muitas bezes quedou a las manos de ls homes nua lhuita zeigual.
L miedo que tengo ye s'un die tubir un nieto i yá nun tenga ne l praino Mirandés un lhobo para el ber.
Ah cumo you gustaba de sentir un friu que chubie pul spinhaço arriba i me ponie l pelo an puonta.
Seinha de lhobo bien acerca.
Esta cuonta de l lhobo que l pon a pensar cumo un houmano ye guapa.
S'assi ye ten que haber lhobos para que haba cuontas
Un abraço